La comedia harem, tamién conocida como harem anime o harem manga dependiendo del mediu del que se fale, ye un términu emplegáu nel anime y manga pa referise a les hestories n'onde un personaxe masculín ta arodiáu y davezu viviendo con varios personaxes femeninos. En munches ocasiones esti tipu de series son adautaciones de xuegos de simulación de cites o diseñaos p'atrayer audiencies asemeyeaes, n'especial espublizaciones seinen. El términu foi creáu por fanáticos occidentales a lo que se conoz usualmente como lovecomi (comedies romántiques), sicasí la so implicación básica ye conocida tamién polos fanáticos xaponeses.
L'usu orixinal del términu se creye qu'entamó nos Estaos Xuníos col ésitu de Tenchi Muyo!, y dende entós tevo en xeneral, connotaciones negatives o satíriques. Describe la situación na qu'un protagonista masculín de cualidaes 'xenériques' convive con varies moces perguapes que nel trescursu de la hestoria amuesen varios graos d'afeutu pa con él. El descontentu parte xeneralmente de varios fautores, como la crítica referente a que los protagonistes masculinos son evidentes "sustitutos d'audiencia" (personaxes que namái esisten pa xustificar l'aición de los otros) y xeneralmente nun podríen atrayer nengún tipu d'atención de les muyeres. En términos xenerales, munchos fanáticos creyen que la premisa de por sí ta demasiao usada y sal a rellucir cuando los escritores se queden ensin idees o temen amosar decisiones romántiques que puean nun prestar a los fanáticos.